讀好啲書，你自己揀

近來囝囝好鐘意睇我煮餸，每晚都嗌住要入廚房，擔張凳仔，就要企係我旁邊睇我煎炒煮炆蒸。有時佢會幫手係水龍頭下面擦乾淨0的瓜皮，有時我會捉住佢手仔教佢係塊砧板上面切菜。不過煎雞翼時滾油四濺, 我都係唔會比佢企咁埋, 有時為安全計索性唔比佢入廚房，但係佢會死心不息，隔住門欄都要睇到實。佢好認真, 好專心。

我炒菜時，佢會問我好多問題，點解要咁快手，點解有時大火, 有時細火，點解要先爆香0的蒜蓉, 點解有啲菜要加水炒, 有啲又唔駛加，點解要典0的酒, 點解唔可以落太多鹽，點解要最後先可以落鹽.......，問完又問，有時要專心做菜、把握時間、分秒必爭時，真係比佢問到我好煩, 不過回心一想, 雖然我阿爸曾經係廚師，佢生前我都無叫佢教我煮餸，我都係呢幾年先識得煮番0的似樣啲0既餸，呢個小朋友年紀輕輕, 已經能夠幫我手整簡單0既Pancake同麵包Pizza，仲好有興趣幫手做家務0忝, 我應該對佢多啲鼓勵同讚賞先啱。等佢過多兩年再高一啲，可能真係可以教佢炒菜，我諗佢會好開心。

囝囝, 你成日話想做挖泥俠 Diggerman，挖個池塘比鴨鴨游水，整個公園比小朋友玩，堆座山比公公行山，究竟大過你想揸挖泥車，定係想做廚師呢？唔緊要，讀好啲書，你自己揀。